idjoma.mt għadu qed jinbena

idjoma.mt

idjomi Maltin

werrej

in-nies

Idjomi b’rabta man-nies.

qisu l-baxa

Irid lil kulħadd jaqdih u ma jiskomoda ruħu xejn. Il-baxa tfisser baxà jew paxà, it-titlu Tork ta’ fizzjal għoli.

lil dan ma sabux barra

Tingħad biex wieħed jenfasizza persuna kemm ikun iħobbha u tkun importanti għalih eż. meta omm lil bintha tgħidilha: “Mela jiena sibtek barra?” jew inkella “Jiena ma sibtekx barra!”

baħri int

Inti bniedem ta’ ħila, bħalma kienu jitqiesu l-baħrin fuq il-baħar.

baħri tal-bnazzi

Bniedem li jkampa biss meta ma jkunx hemm problemi, mhux tajjeb biex jegħleb l-inkwiet. Baħri juri kemm għandu ħila waqt il-maltemp.

babbu

Bniedem iblah, li ma jaf xejn u ma jifhem xejn. Ngħidu wkoll għamilha tal-babbu, meta xi jagħmel taparsi mhux qed jifhem, għax hekk jaqbillu. Babbu ġejja mit-Taljan babbeo: bniedem idjota, baħnan.

babaw

Tintuża ma’ nom biex nintensifikaw dak li rridu ngħidu, eż. għamlet sħana babaw (għamlet ħafna sħana), kellha tieġ babaw (kellha tieġ sabiħ ħafna), għandhom dar babaw (għandhom dar sabiħa ħafna), eċċ.

beżżgħu bil-Babaw

Beżżgħu minn xi ħaġa li mhi xejn. Il-Babaw huwa figura mitoloġika mill-ħsieb u l-immaġinazzjoni li jbeżżgħu t-tfal biha.

avukat

Bniedem moħħu jilħaqlu u makakk, li jagħmel bik li jrid malajr.

donnu l-argużin

Bniedem li jrid jikkmanda hu akkost ta’ kollox. L-argużin kien isawwat kemm jiflaħ lill-qaddiefa tax-xwieni biex jaħdmu.

aħwa tal-ħalib

Żewġ persuni li mhumiex aħwa iżda li kienet traddagħhom l-istess mara.

illaħwa!

Espressjoni ta’ stagħġib għal xi ħaġa sabiħa, kerha, eċċ.

issa aħna lkoll!

Tingħad biċ-ċajt meta jiġi xi ħadd u nagħmlu taparsi qed idejjaqna.

m’aħniex hawn

Ma jafx x’qed jiġri jew jintqal għax moħħu qiegħed xi mkien ieħor.

L-idjomi kollha, f’post wieħed.

WERREJ →