l-elementi
Idjomi b’rabta mal-elementi u l-meteoroloġija.
beda jberraq
Bdew jidhru xi sinjali ta’ inkwiet.
ġiet bħal berqa
Ġiet malajr mingħajr ma kien qed jistennieha.
ġriet bħal berqa
Inxterdet malajr ħafna, bħal xi aħbar xokkanti.
donnu berqa
Bniedem ħafif ħafna f’dak li jagħmel.
hawn belgħa frisk ġmielha
Hawn naqra żiffa pjaċevoli.
bejjet ma sebaħ
Sparixxa, ħadd ma rah iżjed.
jibża’ minnu daqs il-bard
Jibża’ minnu ħafna.
aħjar il-bard ta’ Jannar minnu
Jippreferi jbati bard kbir milli jkollu jissaporti lil xi bniedem li m’għandux pjaċir bih.
qabdu l-bard
Ħassu jibża’, xejn ma ħa pjaċir meta semmewlu xi ħaġa kerha ħafna.
bard ixoqq il-għadam
Bard kbir ħafna.
se jaqa’ bil-bard
Tingħad meta parti ta’ ġismek tkun tant kiesħa li tħossha se taqa’ eż. tħoss widnejk se jibqgħu bil-bard, tħoss idejk se jaqgħu bil-bard, eċċ.
waddab kollox il-baħar
Qata’ qalbu u ma kompliex bil-biċċa xogħol li kien qed jagħmel.
hemm baħar bejniethom
Hemm differenza kbira jew hemm ħafna bogħod bejniethom.
f’baħar wieħed qegħdin
Ninsabu kollha fl-istess sitwazzjoni.
baħar jikser
Baħar li jobrom ħafna u jkollu r-ragħwa.
għaddej il-baħar
Il-baħar imqalleb ħafna minħabba riħ qawwi.
u l-baħar bnazzi
Tingħad biċ-ċajt lil xi ħadd wara li jkun qalilna grazzi, peress li taqbel.
baħar baqta
Baħar kalm ħafna. Baqta tfisser ħalib magħqud meta jiżdiedlu t-tames, jiġifieri likwidu li jittieħed mill-istonku tal-ħrief u jitħallat mal-ħalib biex jagħqad. Minn dan il-proċess jiġi prodott il-ġobon.
baħar jibla’ l-art
Baħar ta’ qawwa kbira li jħabbat kemm jiflaħ mal-blat.
għadda minn baħar
Għadda minn ħafna inkwiet.
ara x’qala’ l-baħar!
Tingħad lil xi ħadd li nkunu ilna ħafna ma naraw jew li ma nkunux qed nistennew li naraw.
baħar żejt
Baħar kalm ħafna.
f’dan il-baħar kien jinsab
F’dan it-tip ta’ dwejjaq kien sab ruħu.
baħar ta’ …
Ħafna minn xi ħaġa eż. baħar ta’ nies, baħar ta’ inkwiet, eċċ.
baħar ix-xatt
Dak li xtaq irnexxielu jiksbu jew jilħqu.
għamlu baħar u anqas mhu għadira
Ħaseb li huwa xi bniedem importanti, imma fil-fatt ma kien xejn minn dan. Id-daqs tal-għadira ma jibdiex mad-daqs tal-baħar.
mar il-baħar
Tingħad meta oġġett ma jibqax tajjeb, jew meta bniedem jonqsu xi ħaġa drastikament (is-saħħa, is-suċċess, proġett li ma jirnexxix, eċċ.).
qam il-baħar
Inqala’ ħafna inkwiet.
kbir baħar
Kbir immens.
ħalli jħabbat il-baħar
Jiġri x’jiġri, toqgħodx tinkwieta. Ngħidu wkoll ħallih iħabbat. Meta l-baħar ikun imqalleb, iħabbat mal-vapuri, id-dgħajjes, eċċ.
hemm baħar jaqsam
Hemm differenza kbira jew hemm ħafna bogħod bejniethom.
jaqbeż il-baħar għalih
Jagħmel minn kollox għalih għax iħobbu ħafna, anke akkost li jweġġa’ hu stess.
iebes daqs l-azzar
Oġġett iebes ħafna, bħall-azzar.
mesaħ l-art bih
Waqqgħu għaċ-ċajt ħafna.
imissu jbuslu l-art fejn jimxi
Imissu jurih aktar rispett għax għamel ħafna miegħu.
qisu taħt l-art
Qed jitkellem wisq baxx u mhux jinstema’.
żamm mal-art
Ma ħariġx wisq ’il barra fil-baħar.
nieżla sal-art
Qed tagħmel ħafna xita bis-saħħa.
baqa’ l-art
Ma leħħaqx ma’ xi ħadd jew xi ħaġa; wasal tard u ma rikibx; m’għaddiex mill-eżami, mit-test, eċċ.
rifes l-art
Niżel minn fuq il-vapur, id-dgħajsa, l-ajruplan, eċċ.
kollox mill-art
Tingħad meta nitfgħu ħafna ħaxix fil-borma mingħajr ma nqattgħuh, dritt mill-art.
tarah fl-art ma tiġbrux
Tant bla valur li lanqas jekk tarah mal-art ma tiġbru.
lagħaq l-art
Kellu jċedi, kellu joqgħod għal xi ħaġa jew xi ħadd.
l-art l-oħra
Ix-xatt ta’ quddiemna.
ried xi ħaġa bl-art u l-baħar
Ried xi ħaġa bilfors u akkost ta’ kollox.
qabbadlu l-art
Urieh x’għandu jagħmel biex kollox jimxi b’mod aktar sod u kostanti, bħal meta tinżel l‑art wara li tkun mort fuq il‑baħar ‑ l‑art iżjed soda.
ma qabadx art
Ma fehem xejn, bħal meta vapur ikun mitluf fuq il-baħar u ma jaqbadx art.
qabad l-art
Kollox miexi b’mod aktar sod u kostanti, bħal meta tinżel l-art wara li tkun mort fuq il-baħar – l-art iżjed soda.
mitluf ma jarax art
Intilef minn sensih, tah sturdament qawwi jew kien fis-sakra ħafna.
xtaq l-art tibilgħu
Staħa ħafna, tant li ried jisparixxi.
art u saqaf
Faqar kbir, kif tixhed daru li ma fihiex għamara u li allura m’għadna xejn ħlief art u saqaf.
daħal bl-arja kollha
Daħal b’ħafna kundienza, mingħajr ma jibża’.
l-arja xorbitu
Qed iħossu għajjien ħafna wara li qatta’ ħafna ħin barra.
ma jarax l-arja ta’ barra
Ma joħroġx mid-dar, joqgħod il-ħin kollu ġewwa.
għandu ħafna arja
Għandu ħafna kunfidenza żejda għax jaħseb li jaf ħafna.
jgħix bl-arja
Ma jiekol xejn jew bilkemm.
għall-arja
Barra, fil-beraħ.
għandu l-arja ta’ kiesaħ
Jidher bniedem kiesaħ.
m’għandux biex jagħmel l-arja
M’għandux biex jitkessaħ, mhux f’pożizzjoni favorevoli.
marritlu l-arja
Waqaf jitkessaħ u jagħmel li jrid għax sab min jiqaflu jew inbidlu ċ-ċirkostanzi. Ngħidu wkoll spiċċatlu l-arja u neħħielu l-arja.
għamel l-arja
Qagħad jitkessaħ, mingħalih aħjar minn ħaddieħor. Ngħidu wkoll rabba l-arja u ħa l-arja.
anqas jekk tagħmillu l-ilma jiżfen
Tagħmel x’tagħmel, qatt m’inti ser tikkuntentah.
ġie mill-ajru
Ġie bla ma konna qed nistennewh.
l-ajru żamm
It-temp baqa’ tajjeb, ma tħassarx.
l-ajru ħa
Qed jinġema’ ħafna sħab fis-sema.
hemm [numru] fl-ajru
Qed nitkellmu dwar dan in-numru ta’ affarijiet.
kollox mar fl-ajru
Kollox sfaxxa fix-xejn, tlifna kollox.
l-ajru għalaq għajnu
L-ajru qed jikrieh u jidher li ġej il-maltemp, ix-xita, eċċ.
l-ajru fetaħ għajnu
L-ajru bbnazza wara perjodu ta’ xita, maltemp, eċċ.
ajru mherri
Ajru ħażin ħafna, b’maltemp li jdum ma jgħaddi.
tela’ l-ajru
Qed jidher ħafna sħab griż tax-xita.
jgħix fl-ajru
Bniedem distratt u moħħu mhux hemm, li m’għandux idea x’inhu jiġri.
ħalla kollox fl-ajru
Ħalla biċċa xogħol fin-nofs u ma spiċċahiex.
L-idjomi kollha, f’post wieħed.